பொங்கல் வாழ்த்து

பொங்கல் வாழ்த்து  

அனைவருக்கும் இன்பம் பொங்கும் பொங்கல்  நல்வாழ்த்துக்கள்.

புதுப்பானைப் பூச்சுற்றி
பொன்மஞ்சள் கிழங்கெடுத்து
செஞ்சீனி சுமக்கும் கரும்பு நட்டு
பதமாய் பக்குவமாய் வயல் விளைந்த
கைகுற்றல் பச்சரிசி போட்டு
பொங்கி வரும் பால்குடமாய் பொங்கும் உள்ளத்தோடு
கண்கட்டி உறியடித்து குதூகலமாய்
நாம் கொண்டாடிய நன்னாளாம்

அடிநாக்கில் ருசி மறந்தாலும்
அடிவயிற்றில் பசி மறக்காத
இந்த மானிட உலகில் வாழும்
வயலில் விதைகளோடு தன் வாழ்வையும்
சேர்த்தே பயிரிடும் உழவனின் உயிர் பிழைக்க

மணிமணியாய்க் கதிர்விடும் மழலை நாற்று வளர ஒளி கொடுக்கும்
உலக உயிர்க்கெல்லாம் இதமாய் வெப்பம் அளிக்கும்
கதிரவனுக்கு நன்றியோடு கைகூப்பும் தைத்திருநாளாம்

அந்த பொங்கல் திருநாள் எங்கள் வாழ்வில் இனி
எத்தனை முறை இனிப்பாய்ப் பொங்கினாலும்
என்றென்றும் மறக்க முடியாது இந்த பொங்கல்...

நித்தம் பால் சுண்டி இனிக்கின்ற தேனூறும் அக்கார அடிசிலாய்
என்றும் காலம் சுண்டி இனித்திடும்
நெஞ்சூறும் இந்த கலையாத நினைவுகள்...

என் இனிய கல்வியியல் கல்லூரி நண்பர்களோடு
அன்று வந்த இந்த இனிய நாளை
அன்போடு நினைவு கூறுகிறேன்.